Nënshkruhet marrëveshja për finalizimin e punimeve në stadiumin ‘Rexhep Rexhepi’ në Drenas
Romak Zeqiri
Stadiumi ‘Rexhep Rexhepi’ në Drenas është ndër stadiumet e pakta në Kosovë që është punuar me ritëm të lartë.
Megjithatë pasi u kompletuan tribunat punimet ngecën dhe tani e tutje do të vazhdojnë.
Ka qenë kryetari i Komunës së Drenasit, Ramiz Lladrovci që i ka dhënë një lajm të madh qytetarëve të tij se është nënshkruar marrëveshja për finalizimin e punimeve në stadiumin ‘Rexhep Rexhepi’.
Lladrovci ka pritur në takim sekretarin e përgjithshëm të MKRS-së, Bislim Bislimin dhe nënshkruan aneks memorandumin me qëllim të përfundimit të punëve në projektin e ndërtimit të stadiumit.
Kështu, stadiumi ‘Rexhep Rexhepi’ do të marrë pamjen përfundimtare, si një e arritur e shumëpritur në shërbim të sportdashësve dhe qytetarëve.
Njoftimi i plotë i Ramiz Lladrovcit:
Sot, pata kënaqësinë të nënshkruaj Aneks Memorandumin e Bashkëpunimit, për finalizimin e ndërtimit të stadiumit “Rexhep Rexhepi”.
Bashkë me Sekretarin e Përgjithshëm të Ministrisë së Kulturës, Rinisë dhe Sportit, z. Bislim Bislimi nënshkruam Aneks Memorandumin me qëllim të përfundimit të punëve në projektin e ndërtimit të stadiumit. Kështu, Stadiumi do të marrë pamjen përfundimtare, si një e arritur e shumëpritur në shërbim të sportdashësve dhe qytetarëve.
Ky stadium i bukur, i plotëson nevojat e komunitetit sportiv në komunën e Drenasit, me kapacitet prej rreth 7 mijë ulësesh dhe se do të jetë i Kategorisë së tretë. Stadiumi do të bëhet i dyti në Kosovë që do të mundësoj zhvillimin e ndeshjeve ndërkombëtare.
Me z. Bislimi diskutuam edhe për stadiumin sintetik në Komoran, Pishinën gjysmë olimpike dhe nevojën e bashkëpunimit edhe për projektet tjera në fushën e sportit, kulturës dhe trashëgimisë kulturore. /Telegrafi/
