Kandidati i Nismës për kryetar të Podujevës, Xhemajl Hasani, gjatë një debati televiziv, kishte tërhequr vëmendjen me deklaratën e tij pasi pyetet nga moderatorja e emisionit se çfarë veture vozitë.
Përgjigja e tij ishte “veturë modeste”, Ferrari. Moderatorja e pyet për vlerën e veturës, Hasani thotë se kushton 70/80 mijë euro dhe kjo deklaratë e Hasanit ngjalli të qeshura në emision.
Tutje, ai nuk posedonte as planprogramin për qeverisjen katër vjeçare në Podujevë, duke thënë se tashmë qytetarët e kanë në duar dhe e kanë mbështetur plotësisht.
Por, pas publikimit të rezultateve të KQZ-së, Hasani mori vetëm 0.54% të votave të përgjithshme në këtë komunë.
Një ditë pas zgjedhjeve, ( të hënën), Hasani ka publikuar disa statuse në llogarinë e tij në Facebook.
Ai thotë se po pret rezultatet përfundimtare, pasi nuk i beson atyre preliminare të KQZ-së.
Tutje, tregon se njerëzit i kanë premtuar për votë, por se prap nuk e ka problem që e kanë gënjyer.
“Rezultateve preliminare nuk duhet me ju besu shumë. Ne po i presim rezultatet përfundimtare e të shohim se çka ka mujt me ndodhë…Krejt me kanë thanë se të kryme e ke këtë farë pune po nejse për veti e kanë”, shkroi Hasani.
Në reagimin e dytë ai flet për programin e kryetarit të AAK-së, Besnik Tahiri.
Sipas Hasanit, qytetarët nuk votojnë për programin e mirë, por votojnë për ata që mashtrojnë.
“Këtu nuk votohet për programin. Programin me të mirë e ka pasë Besniku. As i sinqerti nuk votohet! Këtu votohen ata që dinë me mashtru… Ja pafshi hajrin”, shkroi tutje.
Në regimin e tretë, tha se s’është vetem ai që nuk ka fitu pa balotazh, pasi shton se edhe kandidatët e tjerë që kanë shpresuar më shumë së Hasani, nuk e kanë arritur.
“Nuk jam veç unë që nuk mujta me fitu pa balotazh, Nuk mujtën as ata të tjerët që koxha patën mbajtë ymyd”, shkroi kandidati i Nismës.
Ndërkaq, duhet theksuar se kur janë numëruar 99.10 për qind e votave, Ekrem Hyseni prin me 44.30 për qind ose 16.451 vota, derisa kryetari aktual nga Lëvizja Vetëvendosje, Shpejtim Bulliqi renditet i dyti me 44.00 për qind ose 16.338 vota.
LDK prin në Podujevë edhe në garën për Kuvend Komunal me 38.49%. E dyta renditet LVV me 37.40%. /Telegrafi/