Aktorja dhe këngëtarja, Vanessa Paradis, është martuar me filmbërësin Samuel Benchetrit, ditën e shtunë në një ceremoni të zhvilluar në Saint-Simeon të qarkut Seine-et-Marne në Francë.
Lajmin e ka publikuar gazeta Le Parisien në faqen e vet në internet duke njoftuar për martesën e 45-vjeçares me skenaristin, regjisorin dhe aktorin e njohur francez.
Sipas gazetës franceze, ceremonia kishte zgjatur vetëm 30 minuta dhe gjithçka është bërë për të shmangur fotoreporterët.
“Vanessa Paradis është martuar me Samuel Benchetrit gjatë kohës së ndeshjes ndërmjet Francës dhe Argjentinës…”, shkruan në publikimin e Le Parisien në rrjetet sociale.
Paradis ka qenë e dashura e Johnny Depp për shumë vite (nga viti 1998 deri në vitin 2012).
Ata kanë dy fëmijë bashkë, vajzën Lily-Rose Depp (e lindur në vitin 1999) dhe djalin John Christopher “Jack” Depp III (i lindur në vitin 2002).
Në ceremoninë martesore të aktores ishin të pranishëm dhjetëra të ftuar, në mesin e tyre edhe rokeri francez, Matthieu Chedid, këngëtari Raphael dhe vajza Lily-Rose. /Telegrafi/