Skuadrat e Kosovës i kanë mësuar sot (e martë) kundërshtarët për rrethin e parë në garat evropiane.
Drita si nënkampion do të luajë me Inter Turkun e Finlandës në Ligën e Konferencës, derisa Gjilani me Liepajan e Letonisë, ndërsa Llapi me Buducnostin e Malit të Zi.
Por, shorti deshi që të tria skuadrat tona ndeshjet e para t’i luajnë në udhëtim, derisa ato të kthimit në shtëpi.
Duke marrë parasysh se vetëm stadiumi “Fadil Vokrri” i plotëson kushtet, atëherë UEFA ka vendosur që ndeshja e parë mes Liepajas dhe Gjilanit të zhvillohet në kryeqytetin e Kosovës me datën 7 korrik.
“Për shkak të mungesës së stadiumeve, ndeshja e parë do të luhet në Prishtinë ndaj SC Gjilanit, por ajo e kthimit më 14 korrik në shtëpinë tonë”, ka shkruar klubi letonez në faqen zyrtare.
Kësisoj, Drita dhe Llapi do t’i zhvillojnë dy ndeshjet e para në udhëtim më 7 korrik, derisa Gjilani në stadiumin “Fadil Vokrri” në Prishtinë. /Telegrafi/
