Në Andorra do të jetë një Shqipëri ndryshe. Ervin Bulku kërkon t’u japë një fytyrë tjetër kuqezinjve në udhëtim duke bërë ndryshime të mëdha nga ndeshja e fundit ndaj Turqisë, e pritshme deri diku dhe për paraqitjen e skuadrës.
Pas seancës së fundit stërvitore, ku nuk mungoi si zakonisht dhe presidenti Armand Duka, Bulku dhe Sulejman Mema duket se vendosën përfundimisht dhe se cili do të jetë formacioni për përballjen me Andorrën, ku ka disa ndryshime të rëndësishme përjashto prapavijën ku nuk ndryshon asgjë me Berishën, që qëndron në portë, Berat Gjimshitin dhe Ardian Ismajlin në qendër e Elseid Hysajn e Frederik Veselin të hapur nga krahët.
Ndërkohë në mesfushë e reja e parë është prania e Migjen Bashës përpara mbrojtjes, që preferohet përpara Amir Abrashit, ndërkohë që në qendër Taulant Xhaka do të jetë sërish titullar ndërsa Ergys Kaçe zë vendin e Ledian Memushajt.
Nga krahët ndërkohë do ta nisë nga minuta e parë Eros Grezda që bashkë me Myrto Uzunin do të jenë një mbështetje për qendërsulmuesin, Armando Sadiku që këtë herë preferohet titullar përpara Bekim Balajt, transmeton SuperSport.
Shqetësues për stafin e kombëtares është terreni i impiantit ku do të luhet ndeshja, që është me bar sintetik dhe për më tepër jo i një cilësie të mirë, por përpos kësaj humori gjatë seancës stërvitore ka qenë maksimal ndërsa dëshira e të gjithëve vetëm një, kthim me fitore nga Andorra.
Formacioni i mundshëm: Berisha; Hysaj, Gjimshiti, Ismajli, Veseli; Basha, Grezda, Kaçe, Xhaka, Uzuni, Sadiku.