Përderisa politikanë të ndryshëm në Kosovë, Serbi dhe zyrtarë ndërkombëtarë, çdo ditë po përmendin shkëmbim të territoreve, korrigjim të kufijve apo ndarje të Kosovës, banorët e fshatrave që mundë të preken nga këto ndryshime, kanë jetë të vështirë ekonomike e sociale.
Stanimir Svetozareviç jeton në një fshat në Komunën e Preshevës, që është trevë e banuar me shumicë shqiptare.
Në fshatin e Stanimirit nuk ka ujë, nuk ka linja të trafikut urban apo markete për të bërë blerje.
“Ne jetojmë me ndihma sociale, mendoj se gjysma e fshatit jeton me ndihma sociale”, shprehet Stanimir Svetozareviç për Radio Evropa e Lirë.
Me të njëjtat probleme përballet edhe Kapllan Peci, i cili jeton në fshatin Zhazhë të Zveçanit, komunë në veri të Kosovës, e banuar kryesisht me serbë.
“Boll vështirë është me lëshua vendin tonë, katragjyshët, babgjyshët, baballarët kanë lindur këtu, prej se u krijua kjo dynja ne jemi këtu”, shprehet Kapllan Peci.
Nëse ndodh ndarja apo shkëmbimi i territoreve, jeta e këtyre banorëve në Kosovë e Serbi do të ndryshonte ndjeshëm.
Shtete kryesore të BE-së janë kundër lëvizjeve të kufirit me arsyetimin se do të cenohej situata e sigurisë, ndërsa SHBA është më fleksibile në këtë aspekt.
Në komunat veriore të Kosovës me shumicë serbe, Zveçan, Zubin Potok dhe Leposaviq ekzistojnë rreth shtatë fshatra të banuara me shqiptarë.
Shqiptarët në këto vende janë të shqetësuar për zhvillimet politike të ditëve të fundit.
“Është krijuar në shqetësim për banorët e këtyre fshatrave. Puna nuk është mirë për ne, ne kemi disa male, kemi tokë, t’i humbim këto territore është e dhimbshme”, shprehet Nazif Maleta, banorë i fshatit Zhazhë të Zveçanit.
Ndërsa një serbe që banon në një fshat të Preshevës thotë se do të veprojmë siç do të na thonë, por ajo thotë se shtëpiat nuk do t’i lëshojnë dhe nuk do të ngacmojnë dikë.
Shqiptarët e fshatit Çabër në Zubin Potok thonë se ata nuk do të shpërngulen, pasi këtë nuk e kanë bërë as deri tani.
