Ndihmës trajneri i Klodian Duros te Feronikelit, Faruk Elshani ka folur pas barazimit të ekipit të tij në udhëtim te Trepça ’89.
Trepça ’89 dhe Feronikeli kanë luajtur baras me rezultat 0-0 në ndeshjen e vlefshme për javën e 24-të në Superligën e Kosovës.
Ky barazim ka lënë shije pozitive të klubi nga Drenasi, ani pse ata udhëtuan për tri pikë në Mitrovicë.
“Ne gjithmonë futemi për të fituar, mirëpo fati nuk ishte në anën tonë, pasi që krijuam shumë raste dhe topi nuk u fut në portë, por përfundoi disa herë në shtyllë”, ka thënë fillimisht Elshani pas ndeshjes.
“Me këtë barazim mund të jemi të kënaqur, ashtu siç mund të jemi të kënaqur me këtë lloj referimi, i cili ishte në nivel të detyrës dhe vetëm në këtë mënyrë mund të ecim para”.
“Jo vetëm Niklit, por ndoshta çdo skuadër në Superligë po ju mungon nga një golashënues. Ne duhet të përmirësohemi shumë në këtë drejtim, pasi që rastet nuk po na mungojnë”, përfundoi ndihmësi i Duros. /Telegrafi/