Ajaxi dhe Juventusi kanë luajtur baras (1-1) në ndeshjen e parë çerekfinale të Ligës së Kampionëve që u zhvillua në Johan Cruijff ArenA.
Lojë mjaft dinamike u zhvillua në pjesën e parë. Federico Bernardeschi e pati rastin e parë që në minutën e dytë të takimit, ndërkohë që Wojciech Szczesny e mbrojti goditjen e Hakim Ziyech.
Donny van de Beek u tregua i rrezikshëm për vendasit, ndërsa një tjetër mundësi iu dha anësorit të Juves, Bernardeschi.
Pas disa rasteve nga të dyja anët, ishte njeriu i njohur për golat e tij në Ligën e Kampionëve, Cristiano Ronaldo, ai qe e zhbllokoi rezultatin.
Portugezi kombinoi me bashkëkombësin e tij, Joao Cancelo, i cili harkoi në zonë dhe CR7 shënoi me kokë (45′).
Porsa filloi pjesa e dytë, rezultati u barazua. David Neres i shmangu lojtarët kundërshtarë dhe dërgoi një goditje fantastike drejt portës së Szczesnyt, e cila u ndal në rrjetë (46′).
Në vazhdim, vendasit patën disa raste të njëpasnjëshme në përpjekje për ta shënuar golin e dytë, mirëpo Bianconerët ia dolën të mbaheshin.
Douglas Costa e pati shansin më të mirë për mysafirët në gjysmën e dytë duke i kaluar disa lojtarë, por golin ia mohoi shtylla.
Rezultati prej 1-1 është në favor të Juventusit, pasi ndeshjen kthyese e zhvillon para tifozëve në Torino, mirëpo Ajaxi ka bërë një paraqitje mbresëlënëse, prandaj gjithçka mbetet e hapur. /Telegrafi/