Bashkimi dhe Sigal Prishtina të mërkurën zhvillojnë ndeshjen e dytë të serisë finale të ‘play-offit’.
Takimi do të zhvillohet në palestrën “Sezai Surroi” në Prizren me fillim nga ora 20:30.
Përballjet finale zhvillohen në sistemin, një ndeshje në Prishtinë, një në Prizren, kurse bardhekaltrit e kanë epërsinë e terrenit vendas në rast se seria shkon deri në pesë ndeshje.
Ndeshja e parë i serisë u zhvillua të shtunën në kryeqytet, ndërsa atë e fitoi Bashkimi me rezultat 84-81. Në këtë mënyrë, prizrenasit janë në avantazh prej 1-0.
Skuadra e cila do të shënojë tri fitore në serinë finale, do të shpallet kampion për sezonin 2017/2018.
Kujtojmë se Sigal Prishtina është kampion në fuqi i Superligës së Kosovës në basketboll. Po ashtu, kryeqytetasit këtë sezon e kanë fituar edhe Kupën e Kosovës, pas triumfit në finale pikërisht ndaj Bashkimit.
Bardhekaltrit janë në kërkim të titullit të 12-të që nga paslufta, derisa Bashkimi e dëshiron trofeun e parë të kampionit. /Telegrafi/