Brad Pitt, Halle Berry, Harrison Ford dhe Reese Witherspoon janë vetëm disa nga personazhet e famshëm që do të marrin pjesë në ceremoninë e 93-të prestigjioze të Oscarit.
Çmimet këtë viti janë planifikuar të ndahen më 25 prill gjersa lista e prezantuesve përfshin emra të mëdhenj në skenën e aktrimit dhe modës, shkruan USA Today.
Organizatorët e ceremonisë vunë në dukje në fillim të këtij muaji se ata duan që çmimi të duket sa më shumë që të jetë e mundur si një film dhe jo si një shfaqje televizive.
Përveç kësaj, prodhuesit u dërguan letra nominuesve duke kërkuar praninë e tyre fizike në ceremoni.
Pra, ndryshe nga ceremonitë e tjera të çmimeve (si BAFTA dhe Golden Globes), më 25 prill nuk do të shikojmë bisedat e Zoom të aktorëve dhe prezantuesve.
Ndryshe, filmi që flet për gjenocidin në Srebrenicë dhe ku paraqitet edhe aktori shqiptar, Alban Ukaj “Quo Vadis, Aida?”, po garon për titullin e filmit më të mirë të huaj. /Telegrafi/
