Të paktën tetë persona janë vrarë dhe një është plagosur, pas të shtënave me armë që ka ndodhur në tre lokacione të ndryshme në Georgia të SHBA-ve.
Të shtënat në dy lokacione kanë ndodhur brenda dy qendrave të masazhit në qytetin Atlanta, kurse e treta në periferi të këtij qyteti, transmeton Telegrafi.
I dyshuari është një 21-vjeçar që është arrestuar nga policia. Siç raporton AP, sulmet kanë ndodhur rreth orës 17, kur janë qëlluar pesë persona brenda një qendre masazhi, rreth 50 kilometra larg Altantas.
CNN raporton se dy persona janë shpallur të vdekur në vendin e ngjarjes, kurse tre tjerë janë dërguar në spital – ku dy prej tyre pas disa orëve kanë ndërruar jetë, ka bërë të ditur sherifi Cheroke Jay Baker.
Më pas kanë ndodhur të shtëna në dy lokacione. Policia në Atlanta ka bërë të ditur se i është përgjigjur telefonatës se po ndodh një plaçkitje në një qendër masazhi, ku me të mbërritur në vendin e ngjarjes kanë hasur në tre trupa të pajetë. /Telegrafi/
