Site icon Telegrafi

Napoli nënshtron Ajaxin dhe kualifikohet në fazën tjetër të Ligës së Kampionëve

Imran Amiti

(Foto: Twitter/Screenshot/SSC Napoli)

Napoli e ka regjistruar edhe fitoren e katërt në fazën grupore të Ligës së Kampionëve duke e mposhtur Ajaxin (4-2) edhe në stadiumin ‘Diego Armando Maradona’.

Rezultati u zhbllokua në minutën e katërt të takimit, kur Piotr Zielinski harkoi në zonë, ndërsa Hirving Lozano ishte i saktë me kokë.

Nikoqirët e realizuan golin e dytë përmes Giacomo Raspadorit (16’), i cili pranoi një top nga Khvicha Kvaratskhelia, krijoi hapësirë dhe shënoi gol të bukur.

Ekipi holandez u rikthye në lojë në fraksioni e dytë (49’), kur Davy Klaassen shënoi me kokë pas harkimit nga Calvin Bassey.

Vendasit nuk lejuan befasi duke e shënuar edhe golin e tretë me anë të Khvicha Kvaratskhelia, i cili ishte i saktë nga pika e bardhë (62’).

(Foto: Twitter/Screenshot/SSC Napoli)

Vizitorët nuk u dorëzuan dhe ia dolën ta bënin më dramatik fundin e takimit me golin e dytë. Realizues ishte Steven Bergwijn nga penalltia (83’).

Golat nuk mbaruan këtu, pasi Victor Osimhen (90’) e shënoi edhe të katërtin për ekipin vendas pas një gabimi të lojtarëve mysafirë.

Pas fitores së katërt (12 pikë), Napoli e ka siguruar kualifikimin në fazën e eliminimit direkt të Ligës së Kampionëve dhe tash i mbetet ta sigurojë edhe vendin e parë në Grupin A.

Ajaxi (me tri pikë) do të shpresojë në gabimet eventuale të Liverpoolit dhe në rezultatet pozitive në dy ndeshjet e mbetura për t’u kualifikuar tutje. /Telegrafi/

https://twitter.com/RdScouting/status/1580259143881228293

Exit mobile version