Nga Qeveria e Kosovës përmes një komunikate u kanë shprehur ngushëllime familjarëve të viktimave të sulmit në Gllogjan të Deçanit e po ashtu, është bërë e ditur se ministrja e Arsimit, Arbërie Nagavci dhe zëvendësministrja e Shëndetësisë, Dafina Gexha janë nisur për të vizituar të plagosurin në Pejë.
Ndërkaq, ministri i Punëve të Brendshme, Xhelal Sveçla ka ndërprerë vizitën e tij në Shqipëri dhe është nisur drejt Deçanit.
“Qeveria e Republikës së Kosovës u shpreh ngushëllimet më të sinqerta familjeve të viktimave të sulmit me armë zjarri ndaj autobusit me nxënës në Gllogjan. Për të vizituar të plagosurin që po trajtohet në spital, drejt Pejës janë nisur ministrja e Arsimit, Shkencës dhe Teknologjisë, Arbërie Nagavci dhe zëvendësministrja e Shëndetësisë, Dafina Gexha. Ndërkaq ministri i Punëve të Brendshme, Xhelal Sveçla, ka ndërprerë vizitën e tij në Shqipëri dhe është nisur për në Deçan. Organet e rendit janë mobilizuar për të hetuar këtë krim të rëndë që ka tronditur qytetarët e vendit”, thuhet në komunikatë.
Ndryshe, tre persona kanë humbur jetën nga të shtënat me armë zjarri në një autobus në Gllogjan të Deçanit i cili po barte nxënës.
Ngjarjen tragjike e ka konfirmuar për Telegrafin, zëdhënësi i Prokurorisë Themelore në Pejë, Shkodran Nikçi.
“Tre persona kanë humbur jetën si pasojë e gjuajtjes me armë zjarri”, tha Nikçi për Telegrafin.
në vendin e ngjarjes, ku ka ndodhur vrasja e trefishtë nga një sulm i armatosur në autobusin në Gllogjan të Deçanit, kanë dalë Kryeprokurori i Prokurorisë Speciale, Kryeprokurori i Prokurorisë në Pejës bashkë me zëvendësprokurorin e kësaj prokurorie, për të hetuar rrethanat e kësaj ngjarje tragjike. /Telegrafi/
