Deputeti i Lidhjes Demokratike të Kosovës, Besian Mustafa, ka komentuar programin qeverisës të Qeverisë Kurti, i cili është publikuar ditën e martë.
Mustafa ka thënë se në programin qeverisës të Qeverisë Kurti kanë gjetur shumë fjalë por pak gjëra konkrete, transmeton Telegrafi.
“Kanë mungesë të masave konkrete ose të një rrugëtimi se si do të arrijnë t’i realizojnë objektivat që i kanë premtuar dhe që i kanë reflektuar në program. Flitet për Fondin Sovran, nuk tregon se çka do të bëjë më pasurinë strategjike, se si do të përfitojnë qytetarët, ka shumë pikëpyetje. Po ashtu, edhe Agjencia Zhvillimore nuk tregon se si do të bëjë zhvillimin ekonomik për dallim nga agjencitë tjera”, ka potencuar Mustafa në Debat Plus të RTV Dukagjinit.
Deputeti i LDK-së, madje tha se Qeveria Kurti synon t’i realizojë të gjithë këto me borxh.
“Qeveria në 4 vitet e ardhshme synon t’i realizojë këto me borxhe. Kanë premtuar aq shumë sa që nuk mund t’i financojnë me buxhetin e shtetit. Për katër vite do të shtojnë 1.7 miliard borxhe”, ka pohuar ai.
Mustafa shtoi tutje Qeveria Kurti ka ulur pensionet në krahasim me Qeverinë e kaluar, të udhëhequr nga LDK. /Telegrafi/
