Kryeministri i Kosovës, Isa Mustafa, përmes një postimi në Facebook ka thënë se kosovarët po lënë gjurmë të pashlyeshme në sportin ndërkombëtar.
Ai ka përmendur suksesin e sotëm të xhudisteve kosovare, Majlinda Kelmendi e Distria Krasniqi, të cilat do të përballen në finalen e Grand Prix në Budapest.
Kurse ka lavdëruar edhe Xherdan Shaqirin, i cili ka shënuar një gol fantastik në përballjen ndërmjet Zvicrës dhe Polonisë.
“Xhudo kosovare vazhdon të impresionojë botën e sportit. Majlinda dhe të tjerët na e ngritën Flamurin në Rusi, na i sollën plotë medalje e krenari… Sot në Budapest, Majlinda Kelmendi dhe Distria Krasniqi, pas fitoreve radhazi, dolën të dyja në finalen kosovare për Grand Prix”.
“Me këtë rast, nuk mund të mos e shpreh edhe impresionimin tim me golin e jashtëzakonshëm të gjilanasit tonë Xherdan Shaqiri, në ndeshjen përballë Polonisë. Kosovarët po lënë gjurmë të pashlyeshme në sportin ndërkombëtar. Krenar me Majlindën, Distrian dhe të gjithë sportistët tjerë kulmorë që u lindën në Kosovën tonë”, ka shkruar Mustafa.
