Kryeprokurori i Prokurorisë Speciale të Kosovës, Blerim Isufaj një ditë më parë tha se ka dhënë pëlqimin për heqjen e urdhërarrestit ndaj të sanksionuarit të ShBA-së dhe BE-së, Milan Radojçiq.
Ai nuk tregoi arsyen e heqjes së urdhër-arrestit ndaj Radoiçiqit, por drejtori i institutit “Octopus”, Agim Musliu thotë se asgjë nuk e justifikon një gjë të tillë, pasi ky i fundit ka sulmuar Republikën e Kosovës më 24 shtator.
Musliu thekson për KosovaPress, se asnjë marrëveshje e fshehtë ndërkombëtare nuk mund të aplikohet në raste të tilla, kur bëhet fjalë për një kryekomandant të terroristëve, i cili kryen agresion dhe akte të tilla ndaj një vendi.
“Milan Radoiçiq është kriminel i ndjekur edhe ndërkombëtarisht edhe nga INTERPOL-i edhe nga EUROPOL-i edhe është në listën e zezë të Shteteve të Bashkuara të Amerikës. Sa i përket kësaj që e thatë ju, që Isufaj e ka ndaluar ndjekjen penale të kryeterroristit Milan Radojçiq unë nuk kam koment, nuk i di rrethanat pse ka ndodhur kjo, por sidoqoftë nuk ka asnjë arsye të bëhet kjo sepse Milan Radojçiq ka qenë kryekomandanti i terroristëve i cili ka sulmuar direkt shtetin e Kosovës, Republikën e Kosovës.
Një territor ka pretenduar që ta shkëpus nga Republika e Kosovës dhe janë aktet më të rënda dhe më të sanksionuara me të gjitha ligjet edhe ndërkombëtare, por edhe ato të Republikës të Kosovës, me ligj akt më i rëndë nuk ekziston”, tha Musliu.
Ndryshe, Radoiçiq ka pranuar se qëndron prapa sulmit terrorist në Banjskë të Zveçanit, por që vazhdon të endet i lirë në Serbi.