Deputetja e Partisë Demokratike të Kosovës, Ganimete Musliu ka thënë se pjesëmarrja e bashkëshortit të presidentes së vendit, Vjosa Osmani, në ceremoninë e “Defender 2021”, ka zbehur imazhin e Kosovës.
Musliu ka parashtruar disa pyetje në Kuvend, duke thënë se janë shkelur ligjet me pjesëmarrjen e Prindon Sadriut në ceremoni, pasi që ai kishte veshur uniformën e FSK-së, transmeton Telegrafi.
“Javën që lamë pas në Kosovë u shënua një ngjarje shumë e rëndësishme, që ishte ushtrimi fushor i FSK-së në programin e ‘Defender 2021’. Ushtarët e FSK-së me krenari ishin përgatitur për të dalë të suksesshëm në këtë organizim, por imazhi i FSK-së u zbeh dhe i ngjarjes në përgjithësi dhe kjo u bë nga institucionet e vendit. Pjesëmarrja e bashkëshortit të presidentes në uniformë i zbehu imazhin Kosovës, prandaj kam disa pyetje. Çfarë garde mbanë bashkëshorti i presidentes Osmani? Kur ka mbajtur ai trajnime, a ka pasur ftesë për pjesëmarrje dhe nga kush është ftuar? Nëse nuk ka pasur ftesë, në çfarë cilësie ai ka marrë pjesë, dhe pse ka veshur uniformën e FSK-së?”, tha Musliu në Kuvend.
Ajo ka shtuar tutje se për ego personale nuk guxon të rrezikohet kredibiliteti i Ushtrisë së Kosovës. /Telegrafi/