Prishtina ia doli të merrte një fitore të madhe në Podujevë, pasi mposhti Llapin me rezultat 2-1 në kuadër të javës së katërt në Albi Mall Superliga.
Pas ndeshjes, trajneri i bardhëeklatërve, Ismet Munishi ka thënë se kjo fitore u jep motiv të madh, derisa kanë ende shumë punë për të bërë.
“Akoma kemi nevojë për të punuar. Në pjesën e parë dominuam, në të dytën dominoi kundërshtari. Ndoshta me pak fat fituam”, ka deklaruar fillimisht trajneri i Prishtinës për ArtSport.
“Ndoshta me pak fat kemi mundur të mbyllim ndeshjen më herët. Mendoj që epilogu real ishte fitorja jonë. I falënderoj Plisat që kanë udhëtuar. I presim në numër të madh për ndeshjen ndaj Ballkanit”.
“Sot u testua karakteri i ekipit. Jemi skuadër krejtësisht e re dhe duhet të përballemi me këso situata”.
“Fitorja na jep shumë zemër. Lojtarët treguan karakter, përgatitje fizike dhe të gjitha. Ne do të shkojmë ndeshje pas ndeshje. Do të përmirësohemi në vazhdimësi”, ka shtuar më tej Munishi. /Telegrafi/