Ismet Munishi është shprehur shumë i lumtur me fitoren e Ballkanit ndaj Feronikelit me rezultat 1-0.
Suhareakasit fituan në kuadër të javës së 30-të në Superligën e Kosovës, për të vazhduar ëndrrën për titull.
Trajneri i Ballkanit, Munishi e pranoi se ishte një ndeshje e vështirë, derisa ka pasur lëvdata edhe për gjyqtarin Besfort Kasumin.
“Me thënë të drejtën, hasëm në rezistencë të mirë këtu, hoqëm shumë mund për ta fituar këtë ndeshje. Nuk jam i kënaqur me disa lojtarë mirëpo ndoshta sigurisht që presioni e lodhja e kanë bërë të vetën sepse kjo është ndeshja e tretë që e luajmë brenda javës. Sidoqoftë fitorja i mbulon të gjitha”, ka thënë ai për Super Sport Kosova.
“Desha të theksoj se jam borxh se ka pas një lutje para ndeshjes nga klubi që të mos referojë Besforti (Kasumi), unë sot mundem me them lirisht se Besforti ka referua ndeshjen më të mirë që e kom pa duke referuar dhe shfrytëzoj rastin me e falënderua”.
“Krijuam disa raste mirëpo nuk isha i kënaqur te pasimi i fundit edhe në pjesën e parë edhe në të dytën” përfundoi Munishi.
Ballkani është në vendin e dytë me 62 pikë, tri më pak se lideri Drita ku kanë mbetur edhe tri xhiro për t’u zhvilluar. /Telegrafi/