Deputeti i Kuvendit të Kosovës nga radhët e Lëvizjes Vetëvendosje, Armend Muja ka thënë sot në seancën plenare se anë e fortë e kësaj qeverie ka qenë performanca ekonomike.
Pas një deklaratë të tillë, u dëgjuan të qeshura nga deputetët në Kuvend.
“Anë e fortë e kësaj qeverie ka qenë performanca ekonomike….Në tremujorin e parë të vitit 2024 në bazë të ASK-së rritja e raportuar ishte 5.6 për qind në terma real…Ndërkaq nga vitit 2021, mbi 6 për qind…Larg përtej rritjeve që kanë ndodhur paraprakisht… rritje ekonomike pa borxh”, tha ai.
Deputeti i LVV-së tutje tha se edhe në të kaluarën ka pasur rritje ekonomike po me shkatërrimin e Telekomit të Kosovës për shkak të dividendës prej 500 milionë euro për t’i financuar shpenzimet publike.
“E kjo rritja e fundit e tri viteve është pa borxh…”, tha ai.
“Po mos të ishim ne, 1 miliard euro në buxhetin e shtetit nuk do të ishin… rrjedhimisht i gjithë financimi i shtesave për fëmijë, i gjithë financimi për ushtrinë do të mungonte…”, tha ai.
“10 vjet debat për pagën minimale, u desh me ardh ne për me u rrit paga minimale”, tha ndër të tjera Muja. /Telegrafi/
