Analisti Armend Muja ka thënë se Vetëvendosje ka bërë shumë lëshime në raport me LDK-në dhe, sipas tij, LDK është duke kërkuar shumë.
Muja, në “Debat Plus” me Ermal Pandurin në RTV Dukagjini, ka thënë se nuk është pritur një komplikim i situatës deri në këtë fazë mes LVV-së dhe LDK-së.
Ai ka thënë se ky problem po ndodh edhe për shkak të problemeve të brendshme në LDK e që kanë të bëjnë me raportet e Kryesisë me Vjosa Osmanin.
Analisti thotë se megjithatë LDK-ja ka një traumë nga e kaluara në raportet qeverisëse me PDK-në.
“LDK-ja mendojnë që duhet t’i ndërtojnë gjërat ashtu që të mos iu ndodh ajo që u ka ndodhur me PDK-në. Por atyre nuk u ka ndodhur ajo nga Vetëvendosje”, tha ai, përcjell Telegrafi.
Nga ana tjetër Muja thotë se edhe Vetëvendosje i frikësohet një skenari që “LDK-ja mund ta merr presidentin e pasi ta konsumojë Kurtin ta rrëzojë qeverinë e tij në vitin 2021”.
Muja ka thënë se deri më tani të gjithë kanë pasur dyshime ndaj Albin Kurtit se nuk do të bëj lëshime, por sipas tij është dëshmuar e kundërta.
“Kur Albin Kurti u takua me Isa Mustafën, ata që e akuzonin Kurtin për kokëfortësi i thoshin “ja shtrinë qafën Isës”. E dyta i thoshin se me Kurtin nuk bëhet pushtet, por kur ky i ndau ministritë “pesë me pesë” me LDK-në e akuzuan se e ka për pushtet. Edhe për ministri Kurti i tha Mustafës “zgjedh ti i pari””.
Analisti ka thënë se Kurti, në raport me LDK-në, ka bërë shumë lëshime dhe më tepër nuk mund të shkojë.
“Albin Kurti vetëm me ia dhënë edhe gjashtë ministri LDK-së”, tha Muja./Telegrafi/