Po bëhen pesë muaj që Presidenti i Kosovës, Hashim Thaçi me të cilin ambasadori i Republikës së Kosovës në Republikën e Turqisë, Avni Spahiu, lirohet nga detyra dhe kërkohet tërheqja e tij nga misioni diplomatik për shkak të përfundimit të mandatit. Mirëpo, dekreti i Presidentit ende nuk është zbatuar nga Ministria e Punëve të Jashtme (MPJ).
Lidhur me këtë Jetlir Zyberaj, këshilltar i ministrit të Jashtëm të Kosovës, Behgjet Pacolli, në një prononcim për Telegrafin ka thënë se ky dekret do të zbatohet.
Mirëpo, sipas tij, për shkak të procesit të ndjeshëm të anëtarësimit të Kosovës në Interpol, në të cilin proces ka qenë i kyçur ambasadori Spahiu, atij iu ka vazhduar mandati edhe për disa javë.
Zyberaj thotë se brenda dy muajsh ambasadorit Spahiu, do t’i përfundojë mandati në Ambasadën e Kosovës në Turqi.
“Po natyrisht se ky dekret do të zbatohet. Ambasadori Spahiu, vazhdon edhe disa jave të qëndroj në Turqi për shkak të procesit të ndjeshëm të anëtarësimit në Interpol pasi që ka qenë i kyçur në këtë proces, por brenda dy muajsh i përfundon mandati”, i ka thënë Zyberaj, Telegrafit.
Ndryshe, sipas dokumentit që ka siguruar Telegrafi, dekreti i presidentit është lëshuar më 03.03.2018.
“Avni Spahiu, Ambasador, shef i Misionit Diplomatik të Republikës së Kosovës në Republikën e Turqisë lirohet nga detyra, për shkak të përfundimit të mandatit dhe urdhërohet tërheqja e tij nga misioni diplomatik. Ngarkohet Ministria e Punëve të Jashtme e Republikës së Kosovës, që të ndërmerr të gjitha veprimet e nevojshme për zbatimin e këtij dekreti. Dekreti hyn në fuqi në datën e nënshkrimit”, thuhet në dokumentin e lëshuar nga presidenti i vendit, Hashim Thaçi. /Telegrafi/
