Ministri i Punëve të Jashtme, Behgjet Pacolli, ka reaguar lidhur me arrestimin e një zyrtari të UNMIK-ut, shtetas urs, duke kërkuar të dijë se çfarë kërkoi ai në barrikadat e serbëve të vendosura sot në veri, gjatë operacionit të Policisë së Kosovës.
Në një status në llogarinë e tij në Facebook, Pacolli ka shkruar se MPJ ka thirrur UNMIK-un për sqarime dhe sipas tij do të vazhdojë të bashkëpunojë ngushtë me autoritetet e zbatimit të ligjit për të sqaruar situatën e pranisë së zyrtarit ndërkombëtar dhe lokal të UNMIK-ut në barrikadë.
“Sot, gjatë operacionit policor në veri të Kosovës, policia ka arrestuar një zyrtar ndërkombëtar të UNMIK-ut (shtetas rus) dhe një zyrtar lokal të UNMIK-ut.
Ministria e Punëve të Jashtme e Republikës së Kosovës do ta trajtojë çështjen bazuar në të drejtën ndërkombëtare.
Policia e Kosovës ka njoftuar Ministrinë e Punëve të Jashtme për detajet e ngjarjes.
Ministria e Punëve të Jashtme ka thirrur UNMIK-un për sqarime dhe do të vazhdojë të punojë ngushtë me autoritetet e zbatimit të ligjit për të sqaruar situatën e pranisë së zyrtarit ndërkombëtar dhe lokal të UNMIK-ut në barrikadë”, ka shkruar në Facebook, Pacolli.
Ndryshe Prokurori Special i Kosovës, Sylë Hoxha, ka konfirmuar për telegrafin se zyrtari rus është liruar.
Ai ka thënë se lirimi i tij ka ndodhur pasi që ka imunitet diplomatik dhe nuk mund të mbahet apo ndalohet në polici./Telegrafi/
