Tashmë të gjithë shqiptarët janë solidarizuar me ngjarjen e tmerrshme të së martës që tronditi Shqipërinë.
Mijëra qytetarë të thjeshtë por edhe fytyra publike po ofrojnë vazhdimisht ndihmë për të prekurit nga tërmetet në Shqipëri.
Së fundmi, edhe reperi Mozzik ka nisur një iniciativë bamirëse, duke iu bërë thirrje të gjithë nxënësve e studentëve të Kosovës, që të nisin së bashku një kauzë sensibilizuese për të prekurit nga këto tërmete të fuqishme.
Në një shkrim të bërë në InstaStory, reperi ferizajas bëri këtë thirrje me shpresën se atij do t’i bashkohen qindra studentë e nxënës në këtë nismë.
“Studenta e nxënës të dashur të Republikës së Kosovës, nga nesër merrni iniciativë në shkollën apo fakultetin ku jeni, kush ka mundësi të grumbullojë para për Shqipërinë!”, ka shkruar Mozzik në InstaStory.
Ndërkohë që në njoftimin e dytë, ai ka bërë të ditur për shqiptarët e diasporës se tubimi i të hollave për një tjetër iniciativë bamirëse, bëhet të mërkurën në ora 12:00, në Dusseldorf. /Telegrafi/
