Jose Mourinho ishte tejet i zhgënjyer kur u anashkalua nga krerët e Liverpoolit në vitin 2004 dhe për trajner u angazhua Rafa Benitez. Kështu ka thënë ish-mesfushori Danny Murphy.
Pas largimit nga Porto, strategu portugez kishte dashur të marrë drejtimin e Redsave, mirëpo në Anfield u angazhua trajneri spanjoll.
Gjatë një bisede për talkSPORT, Murphy është pyetur se a ka dashur që të luante nën urdhrat e Mourinhos.
“Të them të drejtën, çuditërisht, për pak kam mundur! Kur Benitez u angazhua te Liverpooli, ishte gara ndërmjet atij dhe Mourinhos”.
“E di këtë fakt. Mourinho e dëshironte shumë angazhimin te Liverpooli. Por, Liverpooli e zgjodhi Benitezin, sepse ai e kishte fituar titullin e La Ligas dhe Kupën UEFA me Valencian”.
“E di se Mourinho ka qenë shumë i zhgënjyer. Edhe unë isha i zhgënjyer, sepse Benitez erdhi dhe nuk më dëshironte. Doja të ishte Mourinho, sepse ai ndoshta do ta kërkonte qëndrimin tim”, ka treguar Murphy.
Trajneri portugez është aktualisht në krye të Manchester Unitedit, ndërsa në Ligën Premier në dy raste e ka drejtuar Chelsean. /Telegrafi/