Këshilltarja në Ministrinë e Drejtësisë, Nazlie Balaj është përplasur me ish-hetuesin e krimeve të rënda, Halit Shaljani në lidhje me motivet që shtynë Naim Murselin të përgatiste vrasjen e Liridona Ademajt.
Në RTV Dukagjini, Balaj ka thënë se vrasje e Liridonës është rezultat i femicidit që ekziston në Kosovë.
“Shoqëria në Kosovë ende nuk e pranon fenomenin e femicidit. Në asnjë mënyrë vrasja e Liridonës nuk mund të konsiderohet me pretekstin e problemeve psiqike. Vrasja e Liridonës dhe të tjerave janë simptoma të një mendësi patriarkale që vepron shoqëria jonë. Prandaj fenomenin e dhunës ndaj grave dhe vajzave nuk mund ta trajtojmë si problem psikologjik”.
Këshilltarja në Ministrinë e Drejtësisë ka thënë se shoqëria duhet ta luftojë këtë fenomen dhe të mos ja lejë detyrën vetëm shtetit.
“Dita ditës po dëshmohet se kemi të bëjmë me femicid në Kosovë”.
Ish-hetuesi i krimeve të rënda, Halit Shaljani, ka thënë se nuk pajtohet me Balajn se në Kosovë vriten vajzat dhe gratë për shkak të gjinisë.
“Nuk mund ta përfaqësojë gjininë mashkullore një person që për shkak të egos së tij të pangopur, vret nënën e fëmijëve të tij. Unë konsiderojë se nuk kemi të bëjmë me një person që është i sëmurë. Kosova nuk është shtet patriarkal që mundohet të fundosë gjininë femërore. Kemi ligje që ofron ndihmën më të madhe edhe gjininë femërore”.
Shaljani thotë burrat nuk janë përkrahës të vrasjeve të gjinisë femërore në Kosovë.
Edhe drejtoresha e Qendrës Kosovare për Studime Gjinore, Luljeta Demolli mendon se vrasja e Liridonës është femicid.
“Motivet sigurisht se janë të ulëta dhe arsyeja e vrasjes sigurisht se është e ulët. Arsyeja nuk është vetëm financiare, pasi ky është një rast femicid. Ai ka pasur urrejtje ndaj Liridonës dhe është rast tipik i femicidit sepse e ka bërë vrasjen në mënyrë shumë të planifikuar”, kishte deklaruar Demolli./Telegrafi/
