Sulmuesi i Paris Saint-Germain, Neymar i ka thënë privatisht lojtarëve të Barcelonës se ai është i bindur se do të kthehet në klub këtë verë.
Neymar përfundoi një transferim rekord botëror prej 220 milionë eurosh nga Barcelona në PSG dy vite më parë dhe 27-vjeçari ka shënuar 51 gola në 58 ndeshje për kampionët francezë.
Megjithatë, braziliani është zhgënjyer nga mungesa e konkurrencës në Ligue 1 dhe është bërë gjithnjë e më i demoralizuar duke luajtur para stadiumeve me më pak se 20 mijë njerëz.
Braziliani ka njoftuar presidentin e PSG-së, Nasser Al-Khelaifi se ai nuk ka ndërmend të luajë për klubin përsëri, ndërsa po shtyn për një kthim të ëndrrave në Camp Nou.
“Nuk dua të luaj më shumë në PSG. Dua të kthehem në shtëpinë time, ku nuk duhet të largohesha kurrë”, i ka thënë Neymar presidentit Al-Khelaifi.
Sipas gazetës katalunase Sport, Neymari gjithashtu iu ka dërguar një mesazh në rrjetin social WhatsApp futbollistëve të Barcelonës, në të cilën ai i siguron se rikthimi i tij është afër.
“Mos u shqetësoni, jam duke ardhur”, thuhet t’iu ketë shkruar reprezentuesi i Brazilit lojtarëve.
Barcelona është e gatshme të paguajë 90 milionë funte për Neymarin dhe të ofrojë njërin nga dy lojtarët: Philippe Coutinho ose Ousmane Dembele. /Telegrafi/