Kryetari i PSD-së ka marrë përgjegjësinë në lidhje me një incident që ka pasur gjatë protestës së djeshme me njërin nga policët.
Molliqaj përmes një shënimi në Facebook ka thënë se ndjen keqardhje për atë çfarë ndodhi gjatë protestës.
“Më takon mua ta marr përgjegjësinë për incidentin teksa po përgatiteshim për të mbajtur fjalim tek qeveria. Unë duhet të isha i përmbajtur pavarësisht provokimeve. Ndjej keqardhje për atë çfarë ndodhi. Mbi të gjitha, kemi përgjegjësi që qëllimi i protestës të jetë parësor dhe efekti i saj maksimal”, tha ai, përcjell Telegrafi.
Megjithatë Molliqaj ka thënë se është provokuar dhe shtyrë nga policët derisa kërkonte hapësirën për një fjalim rasti.
I pari i PSD-së thotë se nuk ka pasur goditje nga ana e tij, por vetëm e ka shtyrë njërin nga policët.
“Jo për t’i bërë bisht paragrafit me lart por një sqarim mbi rastin është i nevojshëm. Ne ishim në përpjekje e sipër që t’i lirojmë shkallët ku planifikonim t’i mbanim fjalimet. Në ato momente, dy komandantët e operacionit më kanë ftuar që të diskutojmë, por në të njëjtën kohë policët tjerë më kanë shtyer, tërhequr zvarrë, sharë e ofenduar. Ajo ka qenë situata kur unë kam shtyrë njërin nga policët. Pra, jo goditje, shtyerje. Lus që videot të publikohen të plota. Komandantët prezent duhet ta japin dëshminë e plotë. Edhe një herë, ky sqarim nuk dua të kuptohet si arsyetim”.
Molliqaj thotë se ka një tendencë nga Qeveria për të kriminalizuar protestën e PSD-së.
Ai thotë se protesta ishte paqësore dhe askush nuk u lëndua.
“Dua ta sqaroj se PSD nuk e ka dhunën mjet as qëllim. Por, futja e protestës në këtë regjistër është paralajmërim. Propaganda që po synon ta kriminalizojë një protestë paqësore ku asgjë nuk është dëmtuar dhe askush nuk është lënduar flet mjaft për tendencat e pushtetit. Trajtimi selektiv i protestuesve po ashtu. Për shkak të pamjes së protestuesve kërkonim që 2 folësit të flasin nga shkallët. Në të njëjtin vend që disa protestues tjerë e kishin bërë para 3 ditësh. Fërkimet që u krijuan në fillim ishin rezultat i kërkesës për fjalim. Pas fjalimeve, i kemi realizuar aksionet simbolike dhe kemi njoftuar që kjo s’është protesta e fundit”, deklaroi tutje Molliqaj./Telegrafi/
