Autoritetet në Moldavi kanë njoftuar se kanë shkatërruar eksplozivin e gjetur në një dron Shahed që u rrëzua në territorin e saj, ndërsa ministri i Jashtëm dënoi “sulmet e vazhdueshme barbare” të Rusisë përtej kufirit ndërsa ajo është në luftë në Ukrainë.
Policia njoftoi se 50 kilogramë eksploziv u zbuluan gjatë hetimit të pjesëve të dronit Shahed që gjetën dje pranë qytetit Etulia në jug të Moldavisë, pranë kufirit me Ukrainën. Të gjithë komponentët e dronit janë mbledhur dhe çaktivizuar, tha policia.
Policia kufitare dyshon se mbeturinat janë pjesë e një droni që u rrëzua nga një sistem anti-ajror ukrainas gjatë sulmeve të natës, të nisura nga forcat ruse në rajonin ukrainas të Izmail të premten, transmeton Telegrafi.
Ministri i Jashtëm moldav Mihaj Popsoy dënoi “sulmet barbare të vazhdueshme” të Rusisë ndaj Ukrainës, të cilat ai tha se prekin drejtpërdrejt Moldavinë.
“Mbetjet e dronit Shahed, të gjetura sot në jug të vendit pranë kufirit, janë një kujtesë e ashpër e dhunës dhe shkatërrimit të mbjellë nga Kremlini”, shkroi ai në rrjetin X. /Telegrafi/