Luka Modric ka reaguar ndaj kritikave për ndarjen e drejtësisë në ndeshjen ndërmjet Real Madridit dhe Bayern Munichut në Ligën e Kampionëve.
Ndeshja kthyese çerekfinale në Santiago Bernabeu u shoqërua me disa vendime kundërthënëse në momentin e dy golave të Cristiano Ronaldos (dyshime për pozitë jashtë lojë) dhe kartonin e kuq të Arturo Vidal.
Mirëpo, mesfushori kroat thotë se kritikët i vërejnë vendimet e tilla vetëm kur janë në favor të Realit dhe jo atëherë kur gjyqtarët gabojnë në dëm të tyre.
“Më vjen keq që ka kundërthënie pas fitores sonë ndaj Bayernit, sepse jam i bindur se ne ishim më të mirë në të dyja ndeshjet, krijuam më shumë raste dhe e bëmë Manuel Neuerin që të shkëlqente”.
“Tash jam mësuar se çfarëdolloj vendimi i gjyqtarëve që është në favor të Realit merr publicitet të madh, ndërsa kur është kundër nesh, askush nuk e vëren”.
“Bayerni pati një penalti joekzistuese në Munih, autogoli i Sergio Ramosit erdhi pas një pozite jashtë loje dhe Vidal është dashur ta merrte kartonin e dytë të verdhë në minutën e 47-të”, ka deklaruar Modric për Sportske Novosti. /Telegrafi/