Ministria e Kulturës, Rinisë dhe Sportit ka bërë një shkrim në lidhje me ndarjen nga jeta të regjisores Vjosa Berisha.
Në postimin e shpërndarë në Facebook kanë shprehur ngushëllime me rastin e vdekjes së artistes.
Në shkrim mes tjerash lartësohet figura e regjisores së famshme, me një veprimtari të bujshme mbi 20 vjeçare në industrinë e filmit.
Postimi i plotë i MKRS-së (pa ndërhyrje):
“Me pikëllim të thellë morëm lajmin e hidhur për ndarjen nga jeta të regjisores dhe producentes, Vjosa Berisha.
Ikja e parakohshme ka ndalur përgjysmë veprimtarinë e saj artistike, menaxheriale dhe kjo lë zbrazëti shumë të madhe në artin dhe kulturën e vendit tonë.
Vjosa Berisha, në 50 vitet e saj, la një trashëgimi mbi 20 vjeçare në industrinë e filmit dhe ishte bashkëthemeluese dhe drejtore e Festivalit Ndërkombëtar të Filmit “PriFest” për më shumë se një dekadë. Kolegialiteti, qasja pozitive dhe angazhimi i saj ishte i pashoq dhe do ti mungoj gjithë komunitetit artistik.
Sot nuk e humbëm vetëm një artiste, por humbëm një person me vlera të çmuara që kontribuoi pareshtur për kulturën e re të vendit tonë.
Ngushëllime familjes, miqve, dhe shoqërisë tonë!”. /Telegrafi/
