Juventusi i Massimiliano Allegri e ka zgjatur numrin e ndeshjeve pa humbje dhe e ka përforcuar pozitën e katërt në tabelën e Serie A ( me gjashtë pikë përpara Romës dhe Atalantas).
Mirëpo, stili i lojës së tij vazhdon t’i ndajë tifozët e Zonjës së Vjetër lidhur me pëlqimin apo mospëlqimin e tij.
Bianconerët e filluan keq sezonin 2021/2022 duke grumbulluar vetëm dy pikë në katër ndeshjet hapëse, mirëpo Allegri arriti ta rikthejë ADN-në e skuadrës dhe tashmë madje ka arritur ta përfshijë Juven në garën për titull (me shtatë pikë prapa liderit Milan).
Loja e strategut italian është shumë praktike, e bazuar në qëndrueshmërinë ne mbrojtje. Bardhezinjtë të dielën regjistruan fitore minimale (1-0) ndaj Spezias duke e ngritur në 14 numrin e ndeshjeve pa humbje në Serie A.
Mirëpo, njësoj sikurse në qëndrimin e tij të parë, Allegri është duke u kritikuar një një pjesë e tifozëve të klubit lidhur me stilin defensiv të lojës.
Kur barazoi ndaj Villarrealit (1-1) në Ligën e Kampionëve, trajneri reagoi ndaj kritikave duke thënë se më shumë preferon të fitojë sesa të zhvillojë lojë të bukur. “Do të preferoja ta shoh një Juventus që fiton, e më pak të bukur. Është çështje shije”.
Debati ka vazhduar edhe pas fitores ndaj Spezias, pasi një grup i tifozëve e kanë vërejtur Allegrin duke iu thënë futbollistëve që ta qarkullonin topin dhe të kishin durim derisa të gjenin një hapësirë në mbrojtjen e kundërshtarit.
Sipas kësaj pale të tifozëve, ideja e trajnerit për futbollin nuk është që të bëjë lojë të bukur dhe ta sulmojë ekipin kundërshtar, por të presë gjatë gjithë kohës derisa skuadra tjetër të bëjë një lëshim dhe të krijojë hapësirë.
Juventusi e shkarkoi 54-vjeçarin në vitin 2019 duke e angazhuar Maurizio Sarrin, i cili pritej t’i jepte Zonjës së Vjetër një stil më spektakolar të lojës. Mirëpo, me të dhe pasuesin e tij, Andrea Pirlo, Juventusi shkoi duke rënë nga forma dhe niveli, në të cilin e kishte ngritur Allegri. /Telegrafi/