Në vazhdimin e seancës plenare të Kuvendit të Kosovës po shqyrton pesë marrëveshjet ndërkombëtare financiare për votimin e tyre.
Ministrja e Financave, Hykmete Bajrmai ka arsyetuar para deputetëve projektligjin për ratifikimin e marrëveshjes për financim ndërmjet Kosovës dhe Asociacionit Ndërkombëtar për Zhvillim për Projektin e Fuqizimit të Sektorit Financiar, përcjell Telegrafi.
Bajrami duke kërkuar nga deputetët që ta votojnë këtë marrëveshje, tha se vlera e përgjithshme e marrëveshjes është 22.3 milionë euro me normë të interesit 1.25 përqind me përshtatje të bazës së interesit dhe tarifë të shërbimit prej 0.75 përqind.
“Është një marrëveshje në mes të Republikës së Kosovës dhe Asociacionit ndërkombëtar për Zhvillim pjesë e Bankës Botërore e cila do të implementimet nga Fondi Kosovar për garantimin e kredive. Projekti është negociuar nga ekipi i kryesuara nga ministria e Financave në vijim të bashkëpunimit të ngushtë me Bankën Botërore si partner i rëndësishëm në Kosovë. Vlera e përgjithshme e marrëveshjes 22.3 milionë euro me normë të interesit 1.25 përqind me përshtatje të bazës së interesit dhe tarifë të shërbimit prej 0.75 përqind, gjë që e bën këtë kredi mjaft të volitshme. Periudha e kthimit është 25 vjet dhe grejs periudha është 5 vite. Qëllimi i këtij projekti është përmirësimi qasjes në financa për ndërmarrjet të vogla dhe të mesme, duke e forcuar kapacitetin financiar të Fondit Kosovar për garanci kreditore”, tha Bajrami.
Deputeti i Partisë Demokratike të Kosovës, Memli Krasniqi ka thënë se nuk do ta votojnë asnjë prej këtyre pikave.
“Nuk kemi votë për qeverinë e mashtrimeve 2.0. Nuk do të marrim pjesë në pikat në vijim të seancës”, tha Krasniqi. /Telegrafi/
