Lajmi i kryeministrit shqiptar Edi Rama se brenda 24 orëve nuk ka pasur asnjë të shtruar në spitale nga COVID 19 shënon edhe zyrtarizimin e mbajtjes së edicionit të dytë të UNUM Festival.
Në ambientet e hotelit Princ Adriatik te Rëra e Hedhur në Shëngjin sot është mbajtur konferenca zyrtare e festivalit.
Nga data 3 deri më 7 qershor në plazhin e Rëra e Hedhur në Shëngjin, UNUM Festival pritet të sjell turistë nga mbarë bota.
Ministri shqiptar i Turizmit, Blendi Klosi konfirmoi se mbajtja e festivalit do të bëhet në bashkëpunim të ngushtë me Ministrinë e Shëndetësisë.
“Ne dhe kryeministri e kemi thënë se duam të jemi kampion të turizmit në Ballkan dhe për të qenë kampion duhet të kemi gjithsesi aktivitete si UNUM-i, i cili vjen kësaj radhe me DOKUFEST-in”, ka thënë ai.
Organizatorët e festivalit kanë konfirmuar se deri më tani janë shitur deri në 80 për qind të biletave.
Zëdhënësi i festivalit, Ardin Badiviku ka treguar se testet e shpejta do të bëhen për të gjithë ata që nuk janë të vaksinuar apo nuk kanë një test valid brenda 72 orëve.
Fal mbështetjes së ONE Telecom, kompania e telekomunikimit në Shqipëri , UNUM Festival do të mbahet në bregdetin e Shëngjinit nga data 3-7 Qershor.
I pranishëm edhe kryetari i bashkisë së Lezhës, Pjerin Ndreu, shprehi mbështetjen e plotë për organizatorët e festivalit duke e vlerësuar UNUM-in si një ndër ngjarjet më të rëndësishme për turizmin shqiptar.
Gjatë 5 ditëve të festivalit tanimë janë të konfirmuar mbi 75 artistë ndërkombëtar e rajonal, ndër DJ-të më të mëdhenj të muzikës elektronike në botë.
Konferencës i parapriu edhe pastrimit i plazhit të Shëngjinit.
Për informata shtesë mund të vizitioni faqen e UNUM Festival.
