Ministri i Kulturës, Rinisë dhe Sportit, Kujtim Gashi ka konfirmuar pranimin e stadiumit ‘Fadil Vokrri’ nga UEFA për zhvillimin e ndeshjeve të Përfaqësueses së Kosovës.
Sot (e enjte) UEFA ka dhënë dritën e gjelbër për zhvillimin e ndeshjeve ndërkombëtare të Kosovës në stadiumin ‘Fadil Vokrri’.
Këtë lajm e ka konfirmuar edhe ministri Kujtim Gashi me anë të një postimi në Facebook, ku ka uruar të gjithë futbolldashësit me këtë lajm.
Postimi pa ndërhyrje i ministrit Gashi:
UEFA konfirmon se stadiumi “Fadil Vokrri” është i gatshëm për ndeshje ndërkombëtare
Sot pranuam konfirmimin nga Unioni i Federatave Evropiane të Futbollit (UEFA) konfirmimin se stadiumi “Fadil Vokrri” mund të përdoret për zhvillimin e ndeshjeve ndërkombëtare. Konkretisht, UEFA ka lejuar përdorimin e stadiumin për ndeshjet e UEFA Nations League, ku Kosova do të zhvillojë ndeshjen kundër Ishujve Faroe më 10 shtator 2018.
Me këtë rast uroj tërë komunitetin futbollistik në Kosovës, duke filluar nga Federata e Futbollit të Kosovës, klubet, futbollistët e punëtorët sportiv.
Ne si ministri dhe unë si ministër personalisht, në vazhdimësi dhe me angazhimin të madh kemi punuar që të vijmë deri tek kjo ditë kur zyrtarisht të na lejohet që të zhvillojmë ndeshje ndërkombëtare në stadiumet përbrenda territorit të Republikës së Kosovës.
Njoftoj komunitetin sportiv në përgjithësi dhe atë të futbollit në veçanti se UEFA na e ka dërguar konfirmimin që lejon përdorimin e stadiumit ‘Fadil Vokrri’ për zhvillimin e ndeshjeve ndërkombëtare në kuadër të Ligës së Kombeve në kuadër të UEFA-së, dhe më 10 shtator Kosova do të shënojë një fakt historik sepse për herë të parë luan në një stadium të pranuar ndërkombëtarisht në territorin e vet dhe nuk ka nevojë të shfrytëzojë arenat sportive të vendeve tjera.
Dua t’i uroj të gjithë ata që kanë kontribuuar që për punën që stadiumi ka ardhur deri në këtë fazë. Po ashtu i uroj dhe u dëshiroj suksese edhe futbollistëve që do ta shfrytëzojnë këtë stadium modern në të cilin kemi investuar dhe jemi angazhuar maksimalisht për të. Urime
/Telegrafi/
