Militantët e Hamasit kanë publikuar një video të stërvitjes së sulmit të tyre vdekjeprurës në Izrael, ku shihet sesi me paragllajd simulojnë zbritjen e tyre dhe të armëve ku më pas futen nëpër ndërtesa që i kishin shënjuar me yllin e Davidit.
Militantët e njësisë “Falcon” shihen duke ecur nëpër rërë, dhe duke bartur pajisje që mund t’ju hyjnë në punë në operacionin e planifikuar.
Në video ata shihen duke ndezur motorë dhe parashutat duke hapur me të cilat bien në një hapësirë me rërë.
Disa paragllajderë fluturojnë ulët në shkretëtirë para se të zbresin në një fshat – duke mbajtur në duar pushkë automatike me të cilat hapin zjarrin mbi caqet e tyre.
Madje ata inskenuan edhe momentin kur do të kryenin sulmin në festivalin e organizuar në shkretëtirë, ku shumë të rinj izraelitë u vranë nga militantët e Hamasit.
Qindra të rinj ishin mbledhur për një natë plot argëtim në festivalin e muzikës “Rave”, në afërsi të Kibbutz Re’im në afërsi të Rripit të Gazës. /Telegrafi/
