Telegrafi

Milani bën një hap fals, ndalet me barazim nga Salernitana e vendit të fundit

Shkumbin Pireva

Milani nuk ka arritur më shumë se një barazim 2-2 në udhëtim te Salernitana në ndeshjen e vlefshme për javën e 26-të në Serie A.

Rossonerët kanë humbur një mundësi ideale për të rritur epërsinë me ndjekësit në tabelë, pasi është ndalur me barazim nga vendi i fundit në tabelë.

Pjesa e parë e ndeshjes u karakterizua me lojë të barabartë nga të dyja skuadrat, si nga rastet ashtu edhe nga golat, pasi dy ekipet shënuan nga një gol.

Goli i parë i ndeshjes erdhi pas vetëm pesë minutave lojë dhe ishte Junior Messias, i cili shënoi për 0-1 pas asistimit të Theo Hernandez.

Vendasit arritën të kthehen në lojë në minutën e 29-të me anë të Federico Bonazzolit, i cili shënoi një supergol me gërshërë për 1-1.

Në pjesën e dytë, mysafirët ishin skuadër më e mirë, por vendasit shënuan golin e parë dhe ia vështirësuan situatën, pasi deri në fund Rossonerët arritën vetëm golin e barazimit.

Goli i parë në këtë pjesë erdhi në minutën e 72-të dhe ishte Milan Djuric që shënoi me kokë për epërsinë e vendasve 2-1.

Milani u kthye në lojë pas pesë minutave duke shënuar me anë të Ante Rebic nga distanca për 2-2, por deri në fund nuk pati ndryshim rezultati dhe skuadrat u desh të kënaqen me nga një pikë.

Pas këtij barazimi, Milani e sheh veten në pozitën e parë me 56 pikë apo dy më shumë se Interi i dyti, por me dy ndeshje më pak, ndërsa Salernitana renditet e fundit me 14 pikë.

Në ndeshjen e ardhshme, Rossonerët e presin Udinesen, ndërsa Salernitana e pret Bolognan. /Telegrafi/