AC Milan tashmë është në kërkim të një trajneri të ri, pasi sipas raportimeve të shumta nga mediat botërore, Stefano Pioli do të lirohet nga pozita e tij në fund të sezonit.
Një emër i ri që po qarkullon dhe i cili po thuhet se është favoriti kryesor për t’u bërë trajneri i ri i Milanit sezonin e ardhshëm është ai i Julen Lopeteguit.
Sipas një raportimi nga Gazzetta dello Sport, Milani pritet që ta emërojë ish-përzgjedhësin e Spanjës si trajnerin e ri të tyre për sezonin e ardhshëm.
Klubi beson se aventurës së Piolit i ka ardhur fundi dhe se është koha për një ndryshim në stafin e trajnerëve.
Fati i teknikut italian u vendos pas humbjes së ‘Rossonerëve’ me rezultat 2-1 ndaj Romës në ndeshjen e dytë çerekfinale të Ligës së Evropës, që shkaktoi eliminimin e tyre nga kjo garë, duke konfirmuar një sezon pa trofe.
Pioli ka arritur që të fitojë Scudetton me Milanin, por paraqitjet e ekipit këtë sezon kanë qenë zhgënjyese, përkundër blerjeve të reja.
Lopetegui së fundmi ka drejtuar Wolvesin në Ligën Premier, por u largua nga ky post pasi klubi nuk ia doli që t’ia plotësojë kërkesat për transferime.
Lopetegui ka drejtuar Spanjën në grupmoshat U19, U20 dhe U21 ndërsa ka drejtuar edhe ekipe si Real Madridi, Porto dhe Sevilla, ku me këta të fundit fitoi titullin e Ligës së Evropës./Telegrafi/