Etrit Berisha pritet të largohet nga Torino gjatë afatit kalimtar të janarit.
Portieri shqiptar këtë edicion nuk ka pasur fare hapësira te Torino dhe largimi duket i pashmangshëm në janar.
Prishtinasi dëshiron një skuadër ku luan rregullisht pasi trajneri Ivan Juric po i beson më shumë Milenkovic-Savic në portë.
Menaxheri i Berishës, Federico Pastorello ka folur për të ardhmen e tij duke thënë fillimisht se afati kalimtar gjithmonë është i vështirë për gardianët.
“Afati kalimtar për portierët është shumë i vështirë, pasi një klub e merr një portier vetëm në momentin kur ka nevojë. Ndërkohë, në rastin e një mbrojtësi, mesfushori apo sulmuesi, një skuadër i merr edhe për të kompletuar grupin”.
“Kështu, situata për portierët është e ndryshme dhe rrallë ndodh që një klub të mos ketë një titullar fiks. Mendoj se nga ana teknike, Berisha meriton të luaj në Serie A”.
Tutje Pastorello ka thënë se janë befasuar nga sjellja e Torinos, pasi kanë pritur që Berisha të luante më shumë duke marrë parasysh ndeshjet shumë të mira të zhvilluara sezonin e kaluar.
“Duhet të theksoj se sjellja e Torinos na ka befasuar pasi sezonin e fundit Berisha luajti dhe bëri paraqitje pozitive e në këtë formë, priste që të kishte të paktën mundësinë për të rivalizuar për një fanellë titullari”.
“Kjo nuk ndodhi dhe po punojmë të gjejmë një mundësi tjetër, të shohim nëse do të gjejmë një klubi në Itali apo edhe jashtë”, deklaroi Pastorello. /Telegrafi/