Ministri i Mbrojtjes, Armend Mehaj, ka akuzuar Beogradin se përmes propagandës dhe lajmeve të rreme, po krijon pasiguri dhe destabilitet në veri të Kosovës.
Dhe me këtë sipas tij, po e dëshmon që është “prodhuesi më i madh i propagandës dhe lajmeve të rreme, për arritjen e qëllimeve të tyre që nuk përkojnë me demokracinë, paqen dhe stabilitetin, nuk kanë zgjedhur as forma as mjete”.
“Ata janë në gjendje të shkojnë aq larg, sa të inskenojnë raste dhe situata deri në atë nivel sa të vrasin qytetarët e tyre, e t’ua lënë fajin shqiptarëve”, ka shkruar Mehaj në Facebook.
“Rastet e tilla janë ende të freskëta për ne, kujtojmë rastin “Panda” ku u vranë gjashtë të rinj serbë, nga vetë forcat serbe dhe për këtë u akuzuan shqiptarët, ky rast më së miri dëshmon që propaganda serbe vazhdon deri në pa kufi”.
Tutje, ka thënë se fushata e nxitjes së urrejtjes dhe e krijimit të pasigurisë sidomos në veri të vendit, nuk bëhet rastësisht.
“Kjo po ndodh pikërisht tani në prag të takimit të Kryeministrit, Kurti me Sekretarin e Përgjithshëm të NATO-s, Jens Stoltenberg. Në vazhdimësinë e lajmeve të rreme, mediat serbe kanë publikuar lajmin kinse në veri të vendit kanë qarkulluar dy automjete të ushtrisë së Kosovës, ky lajm është i pa vërtetë, është lajm i rremë”.
Mehaj ka apeluar te qytetarët, sidomos te ata në veri të vendit, që të mos bien pre e siç ka thënë, mediave propaganduese të Serbisë.
“Për informim shërbehuni nga informacionet zyrtare të institucioneve përgjegjëse për sigurinë në vend, të cilat janë në shërbim të secilit qytetarë të Republikës, pa dallim”. /Telegrafi/
