Transmetuesi shtetëror rus i propagandës Russia Today i njohur si RT ka humbur luftën gjyqësore me Bashkimin Evropian.
Sipas këtij vendimi, transmetimi i RT-së do të mbetet i bllokuar në vendet e BE-së.
RT po përpiqej të apelonte ndalimin e tij në BE, një vendim i marrë në muajin mars pas nisjes së agresionit ushtarak rus të paprecedent në Ukrainë. Megjithatë, Gjykata e Përgjithshme Evropiane e hodhi poshtë ankesën.
Si pjesë e një pakete të gjerë të sanksioneve kundër Kremlinit, BE-ja kishte pezulluar transmetimin e medieve ruse si Sputnik dhe RT.
Në të njëjtën kohë, propaganda ruse dhe veçanërisht RT po zgjerohen përtej Evropës. Transmetuesi po krijon qendrën e tij të parë të Afrikës në Afrikën e Jugut, ndërsa Kremlini kërkon të rrisë mbështetjen e tij në rajonin afrikan. Byroja e RT në Afrikën e Jugut do të drejtohet nga Paula Slier, një redaktore që kishte drejtuar zyrën e RT në Lindje të Mesme.
Russia Today, e cila financohet nga Rusia, u themelua në vitin 2005 dhe ka faqe interneti në shumë gjuhë, duke përfshirë anglisht, frëngjisht, spanjisht dhe arabisht.
Kanali është i ndaluar në disa vende, si në Francë, po ashtu duke përfshirë ish-republikat sovjetike të Lituanisë dhe Letonisë.
Në Shtetet e Bashkuara iu kërkua të regjistrohej si agjent i huaj dhe autoritetet britanike ia hoqën licencën e transmetimit. /Telegrafi/