Mbi 20 mijë euro shpenzime nga ish-ministri Mehaj dhe zëvendësit e tij në gjysmën e parë të vitit

Ish-ministri i Ministrisë së Mbrojtjes, Armend Mehaj së bashku me dy zëvendësministrat Andan Rexhepllar dhe Shemsi Syla, për shtatë muaj shpenzuan plot 20 mijë e 453 euro.

Nga këto para, 6 mijë e 816 euro u shpenzuan vetëm nga ish-ministri Mehaj për udhëtime jashtë vendit.

Mehaj gjithashtu shpenzoi edhe 1 mijë e 240 euro të tjera për akomodim në udhëtimet jashtë vendit.

Ai gjithashtu mori plot 1 mijë e 338 euro mëditje për këto udhëtime që i realizoi në periudhën janar-korrik të këtij viti.

Ish-ministri gjithashtu i harxhoi edhe 43 euro për shpenzime tjera të udhëtimit jashtë vendit.

Sipas të dhënave që ka siguruar Telegrafi nga qasja në dokumentet publike, dy zëvendësministrat Andan Rexhepllar dhe Shemsi Syla nuk shpenzuan asnjë cent për udhëtime jashtë vendit, akomodim e mëditje.

Lexo po ashtu Shifrat e shpenzimeve në Ministrinë e Financave – mbi 3 mijë euro i shpenzoi ministri Murati vetëm për akomodim e bileta

Nga 20 mijë e 453 euro në total sa u shpenzuan për shtatë muaj, 1 mijë e 324 euro shkuan për dreka zyrtare dhe shpenzimet për bife brenda Ministrisë së Mbrojtjes.

Ish-ministri Armend Mehaj për dreka zyrtare shpenzoi 464 euro, kurse për bife 524 euro. Zëvendësministrat Rexhepllar dhe Syla së bashku shpenzuan 336 euro për bife.

Shpenzime pati edhe për telefoni mobile dhe derivate. Për këto dy kategori u shpenzuan plot 9 mijë e 689 euro.

Për telefoni mobile u shpenzuan 869 euro nga të cilat 309 euro i shpenzoi ish-ministri Mehaj, dhe nga 280 euro zëvendësministrat Adnan Rexhepllar dhe Shemsi Syla.

Ndërkaq para të shumta u shpenzuan edhe për derivate, ku shfira e shpenzimeve për shtatë muaj kap vlerën e 8 mijë e 820 euro.

Prej tyre 5 mijë e 400 euro i shpenzoi ish-ministri Armend Mehaj, 1 mijë e 800 euro zëvendësministri Adnan Rexhepllar dhe 1 mijë e 620 euro zëvendësministri Shemsi Syla.

Vlen të theksohet se të dhënat e shpenzimeve janë marrë në kohën kur Armend Mehaj ishte ende në pozitën e ministrit të Mbrojtjes. Kujtojmë se ai dha dorëheqje nga ky post më 8 gusht të këtij viti.

Mehaj ishte emëruar si ministër në këtë pozitë në vitin 2021 kur ‘Qeveria Kurti 2’ kishte filluar mandatin.

Aktualisht postin e ministrit në Ministrinë e Mbrojtjes e ushtron Ejup Maqedonci. /Telegrafi/