Shqipëria nesër fillon ndeshjen e parë për kualifikimet e Kampionatit Botëror ‘Rusi 2018’.
Mbrojtësi i Kombëtares shqiptare, Mërgim Mavraj është optimist se Shqipëria do të dalë e dyta në grup ku bëjnë pjesë edhe dy fuqitë Italia dhe Spanja.
Në një prononcim për ‘Panorama Sport’, para ndeshjes me Maqedoninë, Mavraj ka treguar se si mund ta zë Shqipëria pozitën e dytë.
“Po, kemi nisur ta analizojmë Maqedoninë. Nuk di shumë rreth saj, por me aq informacione sa kam di që është një skuadër me cilësi dhe me lojtarë mjaft të mirë”.
“Ne kërkojmë maksimumin në këtë ndeshje dhe kemi kërkesë të lartë nga vetja jonë. Kemi besim se do t’ia dalim, sepse luajmë në vendin tonë, kemi dëshirë të madhe për të bërë mirë, pavarësisht grupit që është shumë i fortë”.
“Dëshira kryesore është që të jemi në pozicionet dy apo tre dhe për të arritur diçka të tillë duhet ta nisim me një fitore kundër Maqedonisë. E kemi nisur mirë, duke punuar dhe e vlerësuar kundërshtarin. Të tjerat t’ia lëmë 90-minutëshit”, deklaroi Mavraj. /Telegrafi/