Deputeti i Partisë Demokratike të Kosovës, Ferat Shala ka kërkuar nga kryeministri i vendit, Albin Kurti të del me sqarim rreth marrëveshjes për energjinë me Serbinë, ose të kërkojë falje për protestat e siç tha katrahurën që kanë shkaktuar para disa viteve.
Shala para deputetëve të Kuvendit tha se pas nëntë viteve Qeveria Kurti solli një udhërrëfyes për një marrëveshje që është arritur më parë, e për të cilën kanë akuzuar edhe për tradhti kombëtare.
“A është e vërtetë që marrëveshja e cenon integritetin territorial të Kosovës. A është marrëveshje e re, çka ka ndryshuar nga e vjetra që e ka sha, denigru e akterët po ashtu deri në bazën e tradhtisë”, tha ai, duke kërkuar nga Kurti të tregojë për dallimin e marrëveshjes së 2013-së, me këtë të nënshkruar të martën.
“Ose duhet të sqaroni ose duhet të kërkoni falje për atë që keni thënë… Minimumi sot do të ishte të kërkoni falje për gjithë ato protesta e denigrime, e katrahurë….”, tha ndër të tjera Shala. /Telegrafi/
