Pasi largimi nga Pescara është i sigurt, Rey Manaj me shumë gjasa do ta vazhdojë në Serinë B gjysmën e dytë të sezonit.
Sipas mediave italiane, ekipi i fundit që është futur në valle për të siguruar shërbimet e sulmuesit shqiptar është Pisa, ku aktualisht luajnë Edgar Çani dhe Samir Ujkani.
Portali “GianlucaDiMarzio.com”, i profilizuar rreth zhvillimeve në merkato, raporton se bisedimet mes palëve janë në një fazë të avancuar.
Pisa është në kontakt si me Pescarën, ku 19-vjeçari luajti i huazuar në fazën e parë, ashtu edhe me Interin, që ka në pronësi kartonin e Manajt.
Ndërkohë, vetë sulmuesi është shprehur i gatshëm për t’iu bashkuar Pisës, pasi beson te projekti i familjes Korrado, që ka marrë në pronësi klubin.
Po ashtu, vendimtare mendohet të kenë qenë edhe bisedat me Çanin e Ujkanin si dhe me trajnerin Gennaro Gatuso.
Në orët e ardhshme pritet të ketë të tjera zhvillime rreth këtij operacioni.