Stërvitja për disa ditë me Majlinda Kelmendin ka qenë pikë kthese në karrierën e xhudistes së re çeke, Renata Zachova. Zachova 15-vjeçare të shtunën fitoi Kupën Evropiane për kadete që u mbajt në Teplice të Çekisë.
Ajo doli e artë në kategorinë deri 52 kilogramë, kategori në të cilën garon edhe kampionia kosovare, Majlinda Kelmendi, përcjell Koha Ditore. Për Renata Zachovan ky ishte suksesi më i madh në karrierën e deritashme.
Ajo në fund të janarit së bashku me xhudistë tjerë të klubit çek Olomouc qëndroi për stërvitje në Pejë, te klubi “Ippon”. Gjatë qëndrimit në Pejë pati rastin të stërvitet së bashku me kampionet kosovare, por edhe me trajnerin Driton Kuka.
Zachova është çekja e parë që ka fituar medalje të artë në turneun e Teplices.
“Vitin e kaluar u mposhta në raundin e dytë dhe vendosa të ndryshoj diçka. I premtova vetes se vitin tjetër do të paraqitem shumë më mirë. Vendosa së bashku me trajnerin që të përmirësoj stërvitjen time. Trajneri Jiri Stepan ka kontribut të madh në këtë medalje. Në janar ai aranzhoi një kamp stërvitor për mua në Kosovë, ku unë kisha mundësinë që të ushtroja për më shumë se një javë me idhullin tim, Majlinda Kelmendi, kampionen e dyfishtë të botës në kategorinë time”, ka thënë Zachova për sajtin zyrtar të Federatës Evropiane të Xhudos.