Xhudistja nga Kosova, Majlinda Kelmendi ka arritur në finalen e madhe të Grand Slamit të Dusseldorfit në Gjermani.
Majlinda Kelmendi ka vazhduar shkëlqimin e saj duke arritur edhe fitoren e katërt radhazi gjatë ditës së sotme (e premte).
Kësaj radhe, xhudistja jonë ka shënuar fitore në gjysmëfinale ndaj italianes Odette Giuffrida.
Fitorja e Majlindës erdhi me shumë lehtësi, duke e mposhtur me ippon dhe duke arritur në finalen e madhe.
Kështu, xhudistja pejane ka siguruar medaljen në këtë Grand Slam në kategorinë deri në 52 kilogramë.
Në ndeshjen e parë Majlinda fitoi ndaj xhudistes gjermane, Theresa Voll, ndërsa në ndeshjen e dytë shënoi fitore ndaj xhudistes nga Brazili, Eleudis Valentim.
Ndeshja e tretë ndaj koreano-jugores Bokyeong Jeong ishte më e vështirë, por edhe këtu Majlinda arriti të shënojë fitore.
Në finale, pejania do të përballet me Sosorbaram Lkhagvasuren nga Mongolia. /Telegrafi/
