Sulmuesi uruguaian i Atletico Madridit, Luis Suarez e ka këshilluar legjendën Xavi që të presë dhe të mos e marrë një herë postin e trajnerit te Barcelona, pasi sipas tij ka një luftë të brendshme në klub.
Barcelona është duke përjetuar një stuhi këtë sezon, të paraprirë nga largimi i Lionel Messit në fund të afatit kalimtar veror.
Klubi nga Camp Nou e ka nisur tmerrshëm sezonin në La Liga, por dy humbjet në grupe të Ligës së Kampionëve janë kapaku i çdo gjëje.
Trajneri Ronald Koeman po shihet si njëri nga fajtorët kryesor për dështimin e klubit këtë sezon, ndërsa po flitet për një shkarkim të tij.
Tashmë janë publikuar shumë emra të njohur trajnerësh që mund ta marrin drejtimin e Barçës, ku njëri nga ta është legjenda e klubit, Xavi.
Megjithatë, ish-sulmuesi i katalunasve, Suarez ka thënë se brenda klubit ka një luftë lojtarësh dhe Xavin nuk duhet të ngutet për ta marr drejtimin e skuadrës.
“Në Barça ka një luftë që dëmton lojtarët. Unë personalisht rekomandoj që Xavi të presë”.
“Kjo nuk është koha ideale për të arritur në klub. Ai është i zgjuar, duhet të presë momentin”, ka thënë Suarez. /Telegrafi/