Xhudistët nga Kosova, Shpat Zekaj dhe Loriana Kuka i kanë nisur pozitivisht garat në Lojërat Mesdhetare “Oran 2022”, duke shënuar fitore dhe duke u kualifikuar tutje.
Shpat Zekaj e nis mbarë me një fitore në shënim të artë. Xhudisti ynë mundi italianin, Enrico Bergamelli, kategoria deri në 100 kilogramë.
Me këtë fitore, xhudisti pejan u kualifikua në çerekfinale.
Megjithatë, Zekaj nuk arriti të kalojë nën-kampionin e botës për vitin e kaluar, Aleksandar Kukolj të Serbisë, mirëpo ai rrugën drejt medaljes së bronztë do ta vazhdojë përmes repasazhit.
Në anën tjetër, Loriana Kuka është kualifikuar në gjysmëfinale.
Ajo ka mposhtur turken Nurcan Yilmaz, kategoria deri në 78 kilogramë.
Rrethin e parë, Loriana e kaloi pa luftë dhe tani është në rrugë të mirë për të siguruar një medalje.
Në gjysmëfinale, pejania do të ndeshet me kroaten Petrunjela Pavic. /Telegrafi/
