Politikat ekonomike të Bashkimit Evropian, po shndërrohen në pengesë për luftën ndaj Sëmundjes Gungore të Lëkurës, e cila së fundi është shfaqur mes lopëve në vendet e rajonit, raporton KTV.
Kjo pasi që BE-ja nuk pranon vaksinimin e gjedhëve dhe sidomos jo me vaksina që nuk janë të prodhuara në BE, e vaksina kundër kësaj sëmundje është prodhuar në Afrikë.
Ndonëse tashmë ka një masë ndalese të importit nga Bullgaria, Maqedonia dhe Serbia, hyrja e lopëve të sëmura prej këtyre vendeve ka shumë gjasë të bëhet nga kontrabanda. Aq më tepër që Kosova nuk i përmbush as për së afërmi nevojat e brendshme për mish gjedhi.
Sipas epidemiologut Shaban Gollopeni, mënyra e përhapjes së kësaj sëmundjeje e bën të vështirë mbrojtjen prej saj.
Zyrtarë nga Agjencia e Ushqimit dhe Veterinarisë pohojnë që ky institucion është në kontakt të vazhdueshëm me vendet e rajonit që në rast të ardhjes eventuale të këtyre vaksinave, edhe Kosova të furnizohet me to.
Megjithëse Sëmundja Gungore e Lëkurës nuk paraqet asnjë rrezik për njerëzit, ajo mund të prodhojë efekte të gjera në një vend, pasi që klasifikohet si sëmundje socio-ekonomike.
DURIMI_VAKSINIMI I LOPEVE 14_06 from Koha.net on Vimeo.